中環出更：張華峰幫200磅囝囝探路「從軍」
香港青少年軍總會上月成立，但就引起社會關注，更被泛民主派質疑成立目的係為咗幫香港青少年「洗腦」。不過，金融服務界立法會議員張華峰就對青少年軍好有興趣，仲特別喺立法會問民政事務局局長曾德成「入會」資格添，唔通佢都想加入青少年軍？
有議員就青少年軍事宜向當局提出質詢，當泛民對當局提出種種質疑時，張華峰就企起身，問曾德成青少年軍幾時開始招募、有咩條件、有冇體重限制。張華峰身形不嬲都好有分量，佢一問完有冇體重限制，在座嘅議員即刻爆笑。不過，曾德成似乎畀張華峰呢個突如其來嘅題問難倒，口窒窒話呢啲入會問題要問番青少年軍負責人喎。
三十幾歲做青少年軍？
原來張華峰咁關注成為青少年軍有冇體重限制，其實係佢想叫囝囝加入，因為囝囝都屬「重量級」，有成二百磅，所以都想囝囝參加鍛煉下身體之餘，相信都可以增加自信心。不過，咪以為叫囝囝就好細個，實情已經喺加拿大讀完書，仲返咗香港做咗幾年嘢，已經三張幾嘢喇，唔會超齡咩？張華峰就話，呢個年代六十歲先係中年，三十歲算係青年咋！
卓妮