中環出更：霍震宇拎住暖水壺行街
已故全國政協副主席霍英東長房三子震震宇好識得享受人生，卓妮不時撞到佢行街購物。早幾日傍晚七點幾，霍震宇又一支公現身中環ifc商場，見佢隨身拎住個暖水壺，睇嚟都幾錫住身體。佢速速買咗一大袋茶葉之後，再行入一間個人護理產品連鎖店，仲踎低研究琳琅滿目嘅維他命丸，盡顯不拘小節嘅一面。
當晚霍震宇一貫西裝打扮滋油淡定咁漫步商場，同平時裝束唔同嘅係手中多咗個暖水壺。佢直行直入一間中式茶莊，隨即喺貨架上左揀右揀，比較各種唔同口味嘅茶葉，亦對茶具好有興趣，店員亦細心為佢解說，仲畀佢試用茶具添。睇完一輪，震宇對茶葉興趣高啲，即爽手買咗一大袋心頭好，好滿意咁離去。
買大量烏龍贈友
既然咁啱撞到，卓妮上前同佢打聲招呼，問佢買咗咩茶葉呢？震宇心情靚靚話，買咗唔少烏龍茶葉，但唔係獨自享用，而係送畀朋友。臨近農曆新年，唔通提早辦年貨？震宇笑笑口話唔係，平時都有買茶葉送畀朋友，唔一定係新年禮物。講起歎茶，震宇話自己咩茶都鍾意飲，唔揀擇喎！
震宇買完茶葉隨即落樓下，入咗間個人護理產品連鎖店，見佢似乎唔熟店內產品擺放位置，問過職員後就喺保健產品貨架前停下，後來索性蹲下仔細研究，仲不時攞起各款維他命丸細心閱讀標示內容，十分認真。不過，震宇睇咗約五分鐘後就起身走人，睇嚟都係唔啱佢心水。
卓妮