新一期港大《學苑》有文章話港人面臨「滅族」，要以抗赤革命自救，又惹來政治風波。身兼港大校董會成員嘅立法會議員鍾樹根就發炮，形容文章如同科幻小說，否則就係「思覺失調」，或是聯同《學苑》編輯一齊開玩笑。樹根又批評《學苑》文章經常幻想香港係獨立民族，邏輯紊亂，如果港人可以定義為一個民族，咁住喺筲箕灣嘅人都可稱為「筲箕灣族」，住旺角嘅人就可稱為「旺角族」喎。咁樹根扎根柴灣區，咁佢咪可以做「柴灣族」？
