政情:岑敖暉好花心?

學聯秘書長周永康(Alex)為咗學業負笈海外在即,其好兄弟、學聯副秘書長岑敖暉(Lester)即傳新戀情?佔領行動期間,好多年輕人、特別係女粉絲都對Alex同Lester呢對學聯孖寶存有無限幻想,更為二人搞惡合組「Alexter」添!不過,二人近日疑似情海翻波,有網民爆料指見到Lester拖女暴走九龍塘港鐵站,女事主更被指係佢上莊、前學聯副秘書長何潔泓(Willis)添!

紅爆網絡嘅Lester去年憑青靚白淨外形吸納大批女粉絲,後期更有迷戀Alexter嘅網民開設「HeHe團」專頁惡搞斷背戀,難得二人唔介意,可惜早前二人被控參與、煽動、召集及組織非法集結罪,可謂落難孖寶。

新女友傳係何潔泓

不過,一直報稱單身嘅Lester其後幾次被拍得同有「九十後社運女神」稱號嘅Willis行街兼撐枱腳,近日有網民踢爆「我見到Lester拖住個女仔係九龍塘港鐵站行得勁快!」,戀情即驚動學運界,有人猜測Lester新對象係Willis,共譜姊弟戀!

我哋搵過兩位當事人甚至「元配」Alex求證,但三人一直未有回覆。不過,有網民不堪打擊,直言「唉,大地震,心碎了」,亦有網民唔相信係事實,質疑「係咪拍拖呀,同男仔定女仔先」;有理性網民就提醒咁話「請記住你不是他的誰,其實他根本沒義務要將自己的私人生活向大眾交代」,仲叫大家畀返啲空間Lester。

我哋問過社運界中人,有人話Willis有固定男友,未見有換畫迹象,而Lester亦似乎仲係單身。傳聞歸傳聞,究竟Lester係咪有着落,建議佢盡快現身澄清,唔係就背負「勾二嫂」罪名,真係水洗都唔清喇!

第一手消息請下載on.cc東網iPhone/iPad/Android/Windows Phone Apps