中環出更：田二少祝政府「速戰速決」
新民黨尋晚舉行四周年黨慶，政商界猛人齊到賀。新民黨主席葉劉淑儀喜上眉稍，急不及待宣布「嫁女」，原來黨內三名區議員今年成家立室。葉太仲特別同據聞仲係鑽石王老五嘅律政司司長袁國強講，今年新民黨紅鸞星動，袁國強出席多幾餐喜宴，分分鐘今年婚事有着落喎！袁國強聞言即刻笑答「承你貴言」，仲話第日佢請飲一定預葉太添！
譚志源「食住先」 體重破頂
新民黨副主席田北辰致辭時就語帶雙關，預祝政府今年萬事順利、「速戰速決」，坐喺枱下嘅政改三人組，相信都好想願望成真喇！講起即將展開嘅政改第二輪諮詢，卓妮發現主力落區巡迴宣傳政改嘅政制及內地事務局局長譚志源身形又脹咗一個碼，譚志源坦言因為經常「食住先」煮到埋嚟就食，體重已經突破二百磅關口。不過第二輪諮詢好戲在後頭，相信譚志源嘅減肥大計仍然遙遙無期。同樣體重「升呢」嘅袁國強就話，自己工作壓力經已好大，唔好再向佢施加減肥壓力咁話！