經過佔領行動一役後，除咗網民，一批年輕專業人士亦有意喺年底參選區議會，靠網絡動員吸納「首投族」（首次投票嘅選民）支持，更點名劍指「雙料議員」葉國謙、梁美芬及「三料議員」李慧琼添！其中被點名挑機嘅梁美芬不但毫無懼色，仲話好想同呢班「前佔領者」對話，終極目標係將佢哋收歸建制派陣營喎，認真雄心壯志。
早前我哋報道過有網民考慮挑戰惹火建制派人物，好似位處西營盤中方敏感地帶嘅中西區區議員盧懿杏、靠佔旺禁制令成功發圍嘅黃大仙區議員陳曼琪等。遇着呢班自稱高質素嘅後生仔參政，梁美芬話好歡迎後生仔同佢打番場選戰，自言身兼大學副教授，好樂意同佢哋對話，希望糾正到佢哋對「本土」、「港獨」嘅錯誤歷史觀，長遠計唔好再狙擊佢，甚至成為自己嘅支持者添！
梁美芬想靠向對手挖角會否太冒險呢？如果有效嘅話，政府亦唔使咁頭痕，如果真係搞得掂，青年事務委員會主席畀佢做又點話？佔領行動促成泛民陣營「換血」潮，相反建制派就極速衰老。據知建制派正積極透過網絡力量吸納年輕建制支持者，以抗衡泛民新勢力，可惜佢哋只識利用社交網站「打卡」交代落區情況，年輕人點會有興趣睇呢？建制派要喺新世代發圍真係要再諗諗計至得嘞。