政情：流會緝兇 議員鬥賴
立法會前日召開今年第二次大會，再次因為法定人數不足而流會。雖然大家已經將立法會流會視作等閒，但由於今次流會唔係死於「拉布」，唔少議員都試圖為呢次離奇流會尋找死因。不過，當時會議廳內得三十三名議員，建制派連同曾鈺成在內有二十四人，泛民主派就得番九人，工黨同公民黨只得兩個人在座，民主黨（白鴿黨）更加影都唔見，可以睇到議員對開會有幾重視，立法會應該加個外號叫「流會樂園」。
前晚八點幾鐘，立法會開始討論由保險界議員陳健波動議嘅「打擊保險詐騙活動」議案，當財經及庫務局副局長劉怡翔發言完畢，主席曾鈺成就宣布進入表決環節。不過，由於建制派反對工黨李卓人（阿人）嘅修正案，阿人要求進行記名表決。由於五分鐘後都未夠法定人數，曾鈺成就叫秘書響鐘傳召議員，即使新民黨田北辰連飯都唔食喺最後四十秒匆匆跑入會議廳，但仍然做唔到拯救會議嘅「白武士」，最後流會收場。
建制斥主席堅持表決
今次流會死因，當然個個都話唔關自己事啦！工聯會黃國健質疑流會係拜曾鈺成所賜，話唔少議員諗住要等到翌日先至可以投票，因此提前少少離開，批評主席無視議會常規堅持表決。嘩！原來議員薪津逾十萬元一個月，係畀佢哋「提前少少離開」嘅！有議員就為主席平反，質疑財經及庫務局官員唔想第二日再去立法會呆坐，所以先至叫曾鈺成喺當晚完成表決。
不過，財庫局中人就大呼冤枉，聲言絕對無暗中向曾鈺成或秘書處施壓，又話由於下一個討論有關基建項目撥款申請進度緩慢嘅議案都係由該局負責，翌日點都要派官員出席，所以根本唔存在要催立法會快啲完喎。
泛民怪阿人太遲通知
今次泛民議員咁少人留守到最後，自然要為流會解畫，有提早「偷走」嘅泛民議員於是倒戈質疑阿人事前唔喺飯盒會「單聲」話會要求記名表決，而喺議案表決前又唔提佢哋要留多一陣，令佢哋大安旨意咁以為唔使投票。原來唔開會都有得賴嘅，咁忙不如退位讓賢啦！
不過，去咗哈爾濱開會嘅民建聯鍾樹根就形容今次流會係「天意」，事關流會令公民黨毛孟靜（阿毛）提出有關壹傳媒大樓被掟汽油彈事件同新聞自由關係嘅休會待續，要延至下星期先至可以提出，到時佢已返港，可以發言鬧爆阿毛喎。