施政報告發表近一星期，最開心肯定要數全港五百多名區議員喇，皆因政府建議明年一月新一屆區議會任期起，向區議員加薪一成半，更增設每屆任期一萬元嘅外訪開支撥款，每月近三萬元人工袋袋平安，無論泛民、建制派都皆大歡喜。
不過，有泛民區議員唔知足，話一萬元外訪最多夠佢哋北上考察，但唔少泛民成員冇回鄉證或唔敢返內地，認真得「錢」無所用。
民主黨（白鴿黨）主席劉慧卿早前赴澳門旅遊被拒入境，令黨內掀起一陣「恐慌」，唔少黨友唔知自己係咪被列入被拒入境名單之內，近月索性避開唔去內地、澳門，擔心被拒入境之餘，更怕北上時連回鄉證都被內地沒收埋。
比佔領行動更早玩佔領嘅乳鴿、中西區區議員許智峯就坦言，一萬元津貼肯定唔夠，加上能夠成功闖關機會微，反建議政府將外訪津貼改為議員辦事處津貼，唔北上都可以留港慢慢使。
不過，話明係外訪津貼，只係幫補吓，就算北上考察都可能會使凸，所以好難話係咪足夠，加上加薪津明年起先實施，今年底選舉成功連任先講啦！