政情：大律師公會亂世下誕新主席
近來不時就政治議題發聲嘅大律師公會尋日舉行周年大會兼換莊，毫無懸念由公會前副主席、現任執委譚允芝（Winnie）接替石永泰（Paul）自動當選主席，係公會十六年來再度出現女主席，副主席則由林定國及鄭華淵出任。新主席誕生於「亂世」，Paul臨別秋波對Winnie有咩寄語呢？
石永泰讚譚允芝夠硬淨
Paul笑言Winnie夠硬淨，對佢好有信心。Winnie亦都話二人在喺公會合作共事多年，投契之餘處事風格亦相似。唔通公會將會延續過去兩年出位作風，言論繼續惹火？今年適逢政改年，政治爭議肯定拗到火紅火綠，出爐主席Winnie強調，公會唔係政治團體，但若社會有同法治相關嘅議題需要公會發聲，公會一定會責無旁貸，但始終新一屆內閣仍未正式埋班，要發聲似乎未係時候。
雖然Winnie同Paul處事風格相似，但Paul笑言二人唱歌風格就唔係好似喇！無他嘅，皆因Winnie係行內公認嘅女高音聲樂家，而Paul過去毫不隱瞞最愛尹光同夏金城嘅歌，大纜都扯唔埋啦。