踏入新一年，世界並不太平，法國巴黎有雜誌社遭恐怖分子持槍襲擊，德國亦有傳媒大樓畀人縱火，估唔到香港都有人模仿。呢，壹傳媒老闆淫賤黎嘅何文田大宅以及集團位於將軍澳嘅總部，尋日凌晨分別畀人掟燃燒彈。外國媒體就話得罪宗教激進組織啫，淫賤黎又同邊個咁大仇口呀？
即係咁，世上沒有無緣無故嘅恨，淫賤黎一向搞風搞雨，唯恐天下不亂，牙齒印多到天光都數唔晒，到底邊個搞佢，自己心知肚明喇。
不過點講都好，開埠以嚟從未試過有傳媒機構被人掟燃燒彈，發生咁大件事，港府點都要回應。律政司司長袁國強係咁講嘅，香港係法治社會，絕不容忍暴力事件，警方會全力調查，有充分證據會依法作出檢控喎。
唓，鬼唔知阿媽係女人咩？正路梗係萬大事由法律解決啦，弊在香港係病態社會，法律唔一定可以儆惡懲奸呢。既然官府冇料到咯喎，民間咪惟有用自己方式解決囉。講真，換着戰爭年代，嗰啲裏通外敵、賣國求榮嘅民族敗類早就畀鋤奸團鋤死，冇可能繼續獻世嘅。再講，作為佔領幕後黑手嘅淫賤黎，一向鼓勵人違法抗爭，家陣有人響應佢嘅號召，掟佢燃燒彈，淫賤黎只不過係引火自焚，求仁得仁啫。
大家有眼見，淫賤黎扮晒「傳媒聖人」、「民主鬥士」，實際上係反中亂港，宣淫販賤。就講佔領運動吖，邊有傳媒老闆好似佢咁，出錢出力、勾結外部勢力不特止，仲赤膊上陣，做埋總指揮o架。最離譜嘅係，佔中擺明係暴力事件，當局居然有法不依放虎歸山，警方甚至連要求搞手協助調查都三催四請，禮遇有加。講到底，咪就係怕佢哋背後嘅洋人囉。
淫媒翻雲覆雨，唔搞死香港唔罷休，對普通人更加唔會留手。咁多年嚟，淫媒作得就作，屈得就屈，富商生癌、女星賣淫、洗頭水致癌等等假新聞，害到唔少人聲譽受損，身敗名裂。如果香港真係法治之區，如果法律面前真係人人平等，點解淫媒可以為所欲為，無法無天吖。
不過咁，淫賤黎喺香港就話可以打橫行啫，換轉其他地方就冇呢支歌仔唱咯。好似喺台灣咁吖，壹淫媒一再因誹謗、敲詐等罪被重罰，甚至有人要坐監添。唔怕唔識貨，最怕貨比貨，邊度不畏淫威，邊度冇規冇矩，唔使多講喇啩。
淫媒公器私用，製造仇恨，撕裂社會，所作所為已經逾越傳媒嘅本分，筆桿子喺佢哋手上，早就變成大殺傷力武器，仲係殺人不見血嗰隻添。淫賤黎作惡多端，有錢人畀佢搞，即使打官司爭取公道，都奈佢唔何，無錢無勢嘅老百姓更加只能忍氣吞聲、任由宰割，不過遇着江湖好漢咯喎，個個唔係省油嘅燈，你用筆桿子捅人時，佢哋亦會用刀把子捅番你，唔係同你講玩o架。
始終都係嗰句︰多行不義必自斃，今次掟燃燒彈最多都係燒死一兩隻曱甴，有啲人如果冥頑不靈，繼續作惡，下次燒死嘅睇怕就係人形害蟲嘞。