政情：撈魚網穿窿 高永文甩轆
等了又等，市民尋日終於有新鮮雞食，之前為本地活雞搞到一頭煙嘅食物及衞生局局長高永文，一日走四場活動，期間聯同立法會漁農界議員何俊賢（高佬賢）出席活動，一同玩撈金魚遊戲，點知疑手震震，撈魚網穿窿，一條金魚都冇。
一日連踩幾場
高永文尋日連走多場活動，凌晨四時出動撲入打鼓嶺檢查站視察活雞供應，之後轉至東涌主持一個步行活動開幕禮，其後再去大埔出席冬日慈善行活動，期間高永文同高佬賢一齊同市民玩撈金魚遊戲。雖然高永文表現興奮，點知撈金魚紙網「得個窿」，搞到一條金魚都撈唔到，好在之後有市民送上自己嘅「魚獲」要求合照，佢先至唔使空手而回。
究竟高永文係因為一早連踩三場活動，休息唔夠先咁失威，定係另有其他原因呢？相信只有佢自己至知嘞！