政情：醫界用民調綁實怪醫
二○一七年特首普選方案通過與否，關鍵在於立法會有無三分之二，即至少四十七名議員投票支持，其中外號「怪醫」嘅醫學界立法會議員梁家騮向來投票意向飄忽，令業界金睛火眼（目及）實佢嘅投票意向。怪醫尋日出席業界政改論壇時表明，會向一萬四千多名業界選民派發問卷收集意見，但當多次被追問會否跟隨業界意願投票時，怪醫都冇正面回應，即時被台下醫生鬧爆佢唔好漠視業界意見。似乎業界嘅潛台詞，係想用民調結果綑住怪醫呢隻無腳嘅雀仔。
稱必否決「全票制」方案
怪醫尋日聯同業界舉辦政改論壇，醫學會會長史泰祖、前會長蔡堅等人都係嘉賓，而論壇其中一個焦點，係怪醫日後於政改嘅投票意向，事關佢平時畀人感覺偏向建制派嗰邊，但一時會喺「平反六四」議案投贊成票，一時又會於擴建將軍澳堆填區投反對票，認真難以捉摸。
怪醫尋日喺論壇上，一有機會就先闡述個人政改立場，話如果政府遲啲提出嘅政改方案比之前嘅有少少進步，佢覺得市民都應該要「袋住先」。至於點樣先叫「進步」？怪醫聲稱「進步」與否好難定義，但認為「全票制」肯定唔係一個進步嘅方案，表明如果當局最終真係拋呢個方案出嚟，佢一定毫無疑問否決喎。
面對怪醫過去投票意向飄忽嘅前科，台下業界代表不斷質疑怪醫係咪想唔理業界訴求，叫佢直接答會定唔會跟民調結果投票。怪醫唔單止畀業界逼埋牆角，連論壇主持人都寸爆佢「不羈放縱愛自由」，話雖然明白怪醫一向嚮往自由，但業界擔心佢過分自由會亂投票，叫佢唔好再帶啲選民遊花園。
梁求饒：畀少少空間我
對於業界中人步步進逼，怪醫疑似喺現階段唔想畀任何承諾，惟有爆出一句「可唔可以畀少少空間我」，又揚言喺政府方案出台後會做多次民調，但係如果民調回覆率太低，或者正反意見比例相近，佢會再考慮其他因素先再決定投票意向，總之就死都唔肯講最後到底會點投。
講到底，業界似乎有一定意願，要怪醫於政改方案表決時跟從業界取向投票。怪醫若要繼續我行我素，似乎唔係咁易可以「過關」。