政情：中環出更：財爺講「古」 盼泛民扭軚？
泛民主派表明會否決喺人大常委會「八三一」框架下嘅政改方案，令二○一七年特首普選「凍過水」，財政司司長曾俊華（鬍鬚曾）最新網誌疑意有所指，表示柳暗花明又一村，強調世事無絕對，有啲說話都係唔好「講得咁死」，唔通佢想暗示畀泛民聽，只要一日未表決，政改仍有一線生機？
促關鍵人物顧全大局
鬍鬚曾喺網誌話，迎接二○一五年，似乎唔係新一年朝氣，而係過去一年嘅納悶，沒完沒了嘅爭拗，不問是非嘅反對，並指世界冇因香港原地踏步。其後鬍鬚曾話題一轉，提到當年古巴導彈危機得以化解，中間有一段充滿戲劇性嘅插曲，就係當時蘇聯核潛艇同莫斯科總部失去聯繫，好彩潛艇第二副手唔同意發射導彈還擊，蘇聯核潛艇冒住畀美軍擊沉或俘虜嘅危險，浮上水面請示莫斯科。
鬍鬚曾認為，不論當初誰是誰非，事件中關鍵人物選擇顧全大局，放下個人面子，頂住壓力，成為化解「大是大非」問題嘅助力。鬍鬚曾借用呢個故事作暗喻政改，莫非佢期待緊泛民有人好似潛艇第二副手嘅人物出現，為命懸一線嘅政改扭轉局面？
卓妮