政情：中環出更：名人好動
近期天氣凍，得閒飲杯熱飲或食嘢暖吓肚真係幾舒服，但唔經唔覺就會食多咗。為保持完美體態，好多名人都會定時定候做運動，當興趣之餘又對身體好。卓妮早前喺馬場同啲名人傾開，發現佢哋好多都有做運動嘅習慣，好似理文造紙執行董事李文斌（Edmond）同太太何芷韻（Amanda），平日勤力做跑步機健身。雖然Amanda身形明顯弗咗，但佢就話跑得唔夠老公快，仲要再努力啲喎。
至於已經跑過四、五次馬拉松嘅Edmond就話，今年都報咗名參加馬拉松，但佢透露，感覺到自己體重增加咗少少，驚跑唔番往年成績，為咗達到過往能於六十分鐘內完成十公里項目嘅水準，佢就話可能要食少啲，加緊練習至得喇。
林凱章四季都游
菁英會副主席林凱章亦有做運動嘅習慣，原來佢喺外國讀書時係游泳校隊成員，參加過唔少比賽並取得勝利。而佢熱愛游水嘅程度去到不分春夏秋冬，冬天游水都唔怕喎。講起好多室內泳池都有暖水時，佢就話所謂暖水可能都係十幾度，唔好話跳落水，冬天除件衫都覺得凍啦，但落水一陣就會適應。佢仲話，近年市面唔少防水MP3可以用來邊聽歌邊游水，游兩、三個鐘都唔會悶，但去沙灘就唔好用喇，費事鯊魚游埋嚟都唔知喎。
仁愛堂副主席史顏景蓮女兒兼馬主史佩加就獨愛有速度感嘅運動，滑雪就啱晒佢。不過，滑雪受季節及地理條件限制，唔係隨時可以滑，佢對上一次滑雪已經係去年三月，而滑雪聖地喺聖誕假期一定人多擠逼，所以會等假期完咗先計劃再出發。
卓妮