政情：拍拖遊羅馬 馮英倫相機被偷
歐洲唔少遊客景點都小偷橫行，好多人都中招。發展局局長政治助理馮英倫（Allen）早前趁聖誕假期同女友Carrie把臂同遊意大利，喺羅馬地鐵站內不幸遇上小偷，眼光光見佢哋只用三秒鐘就搶走部相機，真係驚險。
為免礙行程無報警
講起失竊經歷，Allen仍猶有餘悸。話說佢同女友抵達行程嘅第一站羅馬，佢哋跳上地鐵四圍觀光，有友善嘅當地人早已提醒兩人要打醒十二分精神，睇實財物。誰知話口未完，兩名男子迎面而來，Allen即刻提高警覺，將旅行袋緊緊抱喺心口前，再用外衣將袋遮住，點知小偷睇中佢掛喺腰間嘅相機。兩名小偷趁地鐵埋站車門打開一刻前後夾攻，故意阻擋Allen及女友落車。千鈞一髮間，其中一名小偷使出「閃電手」偷走部相機，當Allen發現後想搶番相機時，兩名小偷已拔足而逃。雖然黑仔到爆，但Allen為免影響行程，未有報警。