政情：中環出更：ＡＶ仁玩辭職 疑肥佬黎搞鬼
民主黨（白鴿黨）立法會議員何俊仁（AV仁）突然話要喺政改方案表決之後辭職，發動變相公投，要求政府重啟政改五部曲，結果畀外界鬧爆。查實白鴿黨內好多人都對AV仁嘅大計有保留，加上該黨中委會未有討論，令人懷疑係被踢爆多次捐款畀白鴿黨嘅壹傳媒集團前主席黎智英（肥佬黎）喺背後發功。當問及有否就辭職公投同肥佬黎傾過，AV仁前日未有斷然否認，推說同民主黨內外一路有關心佢哋行動嘅人都有傾過。
抄台政黨為選戰造勢？
肥佬黎被指係佔中幕後黑手而「周身屎」，已經成日「搞搞震」，難怪令人懷疑佢喺辭職公投一事背後發功。事實上，肥佬黎早前去咗台灣，返港後先後密會佔中發起人戴耀廷、朱耀明等人，日前更密會外號「李漢奸」嘅白鴿黨創黨主席李柱銘、白鴿黨立法會議員單仲偕兩名「老鴿」，前日就出現AV仁推動辭職公投，認真耐人尋味。
再者台灣嘅政黨過去多次藉唔同議題發動公投，旨在為所屬政黨於選舉造勢，同一道理，香港今明兩年將舉行區議會同立法會換屆選舉，難怪令人懷疑有人想抄橋，複製人哋嘅經驗。