政情：中環出更：法爆恐襲潮 葉澍堃淡定
法國巴黎接連發生恐怖襲擊同挾持人質事件，令當地陷入恐慌，仲有人聲稱要搬離巴黎避難。尋日沙田馬場有賽事，唔少名人講起件事，都話意外防不勝防，惟有既來之則安之。四年前曾親歷日本世紀大地震嘅馬會大董葉澍堃（Stephen）就話，相信恐襲嘅目標唔係中國人，唔需要太擔心。
除咗Stephen，馬會副主席周永健、大董陳南祿、利子厚（Michael）同李家祥都有現身。Michael話，由於工作關係佢經常要飛赴歐洲，巴黎一直畀人感覺係藝術之都，相當有文化同埋和平，所以佢對當地發生恐襲感覺好愕然，好彩近年佢多咗來往東南亞國家，所以冇咁驚。
多國機場保安鬆懈
新界鄉議局主席劉皇發兒子劉業強（Kenneth）亦係歐洲常客，每年都會歐遊公幹三、四次，順道探望喺歐洲留學嘅囝囝。Kenneth話，近年發現多國機場嘅保安鬆懈，唔少航空公司只係檢查旅客登記證就可以上機，連護照都冇望吓，擔心恐襲由此而起。
中文大學校長沈祖堯及城市大學校長郭位都有入場，講起早前有傳學聯、學民計劃參選區議會或立法會，沈祖堯話早有聽聞，仲同個別學生傾過偈添。咁佢會唔會支持有潛質嘅學生參選？沈祖堯話，學生咁大個仔，自己決定啦！但以佢所知，暫未有人計劃參選。
郭位就話，香港係自由社會，學生鍾意做咩都得，佢笑言就算想支持學生參選都有心無力，皆因佢唔係香港永久居民，未有資格登記做選民喎！