政情：今日你上鏡：陳羿有潔癖拒辦公室開餐
辛苦搵來自在食，但喺金鐘及中環一帶嘅上班族有時「搵食」都幾慘，食餐飯都又逼又趕。咁啱早幾日我哋遇見勞工及福利局副秘書長陳羿（Donald），急急腳去咗中信大廈一間中菜館，一坐低連茶都未叫就急住點菜。問佢點解咁趕啦，佢話中午得一粒鐘嘅放飯時間，所以要爭取時間喎。
咁點解唔叫外賣返辦公室慢慢歎呢？Donald就自爆有潔癖，就算工作點繁忙、天氣幾惡劣，都唔會買外賣返寫字樓食，原因係枱頭有好多重要文件唔可以弄污，加上佢唔鍾意間房有陣食品味道，甚至怕孳生昆蟲喎。睇嚟搵佢推廣清潔香港真係啱晒！