政情:落鑊在即 肥佬黎疑交帶「後事」

被指為佔領行動幕後「黑手」兼「金主」嘅壹傳媒集團前主席黎智英(肥佬黎),喺上個月金鐘佔領區清場當日靜坐博拉之後就喺其大宅龜縮咗成個星期,直至今個星期警方開始就佔領行動事件展開第二波行動,肥佬黎又突然喺前一日離開香港、前赴台灣,直至前日先返港。肥佬黎尋日就繼續匿喺屋企,但外號「李漢奸」嘅民主黨創黨主席李柱銘、民主黨成員李永達及五名疑似壹傳媒高層,就前後腳到訪佢屋企。唔通肥佬黎知道自己最終難逃法網,被捕「落鑊」在即,所以叫齊人去「臨終」話別,向大家交帶定後事?

全日「龜縮」屋企

肥佬黎尋日一直留喺其位於何文田嘅大宅未有外出,但佢嘅一眾「黨羽」就先後到訪。與肥佬黎同為「搞事四人幫」成員嘅李漢奸就帶埋太太喺中午約十二點到達,唔知係咪同肥佬黎共進午餐。李漢奸太太逗留咗兩個鐘左右就先行離開,留低李漢奸同肥佬黎密密斟。冇幾耐李永達亦獨自搭的士去到黎宅。不過,李永達喺黎宅逗留約半個鐘就跟李漢奸嘅車離開喇。

李漢奸臨走廢噏

李漢奸作為資深大律師,臨走前就被問到去黎宅係咪為隨時被捕嘅肥佬黎提供法律意見,點知佢就答非所問咁,話需有律師在場方可提供意見。李漢奸同李永達離開後,肥佬黎亦未有步出家門,直到傍晚,有四男一女疑似係壹傳媒高層嘅人先後抵達肥佬黎屋企,一時間要見咁多人,好似啲人臨終話別咁款。

其實肥佬黎喺金鐘清場後匿咗喺屋企成個星期,又辭去壹傳媒集團主席及旗下《蘋果日報》社長一職,直到早前就趁聖誕節同太太及兩個仔去日本旅行。而喺警方就佔領事件展開第二波行動前夕,佢忽然再同佔中三子密會,並自行前赴台灣,返港時又故弄玄虛,聲稱喺台灣冇聽電話但又話收到警方電話。尋日佢再同其「黨羽」等人一一會面,莫非佢自知禍港殃民,深知自己罪有應得,所以要喺被捕前交帶所有後事?

第一手消息請下載on.cc東網iPhone/iPad/Android/Windows Phone Apps