政情：今日你上鏡：葛珮帆變「皇阿瑪」 小粉絲

經常喺劇中飾演「皇阿瑪」且形象深入民心嘅內地著名演員張鐵林，日前以世貿聯合基金會總會大使身份來港出席活動，咁啱立法會議員葛珮帆（EQ）係總會名譽主席之一，兩人相遇，EQ隨即變成小粉絲，仲將二人合照放上社交網站添！EQ大讚張鐵林真人好有氣勢，又留意到佢坐咗成個鐘都腰板挺直、目光凌厲。EQ話，好多香港人淨係知道張鐵林將皇阿瑪角色演得活靈活現，但就唔知佢博學多才嘅傳奇一面，包括曾經做過搬運工人，後來考入北京電影學院表演系，更曾赴英國皇家電影學院留學等，○五年起仲擔任廣東暨南大學藝術學院院長，睇嚟EQ真係做足功課喎。