政情:新一代體弱 梁卓偉嘆息

港童愈來愈肥已非新鮮事,但雙手唔夠力就真係好少聽嘞!香港大學醫學院院長梁卓偉就講笑話,依家啲年輕人似乎鍾意做「鍵盤戰士」多過做「體能戰士」,成日唔做運動,手握力都不足,擔心佢哋再係咁,抵抗力又差,慢性病愈來愈多,個個變晒「孱仔」喎。

睇唔過眼 要拋書包

梁出席一個關於香港學童體適能嘅數據發布會,見到港童體重超標又癡肥嘅問題愈來愈嚴重。當佢見到學童手握力測試成績差強人意時,終於忍唔住要「拋書包」慨嘆港童體質實在太「弱雞」,全因個個自細唔做運動。佢引用老子《道德經》第五十五章其中一句「骨弱筋柔而握固」,證明古人已一早畀足健康貼士,意思係自小筋骨夠軟,而且拳頭握得夠力,就代表精氣凝聚集中、健健康康。

如果套用現代醫學角度,手握力的確係體能狀況嘅指標,如果手握力足夠,腦部同心臟血液都較循環,間接令讀書都醒啲呀!嗱,各位家長如果想仔女入港大讀醫,唔好淨係掛住督促佢「咪書」,記得開始練吓手力喇!

第一手消息請下載on.cc東網iPhone/iPad/Android/Windows Phone Apps