政情:中環出更:區璟智未戴頭箍時

外號「頭箍小姐」嘅財經事務及庫務局前常秘區璟智已經享受緊退休生活,喺佢返工最後一日,卓妮都有上佢辦公室講再見。講到最難忘嘅事,區璟智話除咗前往辦公室時必經嘅一條貼滿相片嘅長走廊外,仲有一班好同事,好有心思製作咗一本舊相集做禮物,喺平安夜「Last day」當日送畀佢做紀念。翻開相簿,入面就有區璟智多年前仲未戴頭箍嘅珍貴相片。

80年代與眾AO赴歐受訓

其中有一幅係區璟智與一班同期入職嘅政務主任(AO),包括早前退休嘅「AO歌王」民政事務局前常秘楊立門、接替區璟智任財經事務及庫務局常秘一職嘅黃灝玄、以及即將與教育局常秘謝凌潔貞對調崗位嘅食物及衞生局常秘黎陳芷娟等,喺八十年代初去歐洲受訓時留影。細心啲睇,相中仲可以見到政務司前司長林瑞麟,皆因佢當時正喺倫敦工作,所以期間負責照顧一班AO,認真齊人。

細心嘅同事仲搜集咗唔少區璟智多年來喺不同場合,重複穿着過部分衣服嘅相片,拼湊埋一齊,成功博得頭箍小姐一笑,成為退休前嘅最佳回憶。

卓妮

第一手消息請下載on.cc東網iPhone/iPad/Android/Windows Phone Apps