政情：公民講場：兩位「灰姑娘」為社記撲水

社民連（社記）一年一度嘅「撲水」籌款晚會今晚會喺旺角一間酒樓舉行，主席梁國雄（長毛）向來作為社記募捐嘅生招牌，但佢同副主席黃浩銘因為早前喺佔旺衝突中被捕，而遭法官禁足旺角指定範圍，令撲水晚會形勢急轉直下。不過，兩人尋日成功向法院申請今午五時至午夜十二時踏足旺角出席會慶，但裁判官講明假若二人逾時逗留旺角，或會違反保釋條件。長毛同黃浩銘呢對「灰姑娘」獲裁判官送贈「玻璃鞋」參與晚會，二人真係要生生性性見好就收，否則飲大兩杯隨時出事。