中環出更：陳家洛聖誕度「工作假期」
好多政界人士都會趁聖誕假期同親友歡度佳節，但唔少大專生仍忙於應付考試同交論文。本身係大學副教授嘅立法會議員陳家洛近日亦忙於改卷，希望之後抽多啲時間同啱啱喺波蘭返港嘅大女慶祝生日兼歡度聖誕。不過，有啲唔係咁聽話嘅學生就遲遲未交論文，令佢分分鐘要喺工作中過聖誕。
大女返港慶生
陳家洛大女Monika喺波蘭修讀政治及國際關係，日前返港度假至明年一月中。適逢尋日係Monika十八歲生日，一家五口可以齊齊慶祝，陳家洛話會同阿女切生日蛋糕，亦會送份小禮物，但最重要係叫Monika登記做選民。
由於工作忙碌，陳家洛聖誕假期都唔會外遊，仲話一早叫咗啲學生早啲交論文，唔好堆埋今晚先至交畀佢，可惜到依家都仲未收齊啲論文，令佢嘅聖誕假期危危乎，真係玩殘佢。無計喇，個個老師都話自己嗰科最重要，學生都唔知應該交邊份先，陳家洛惟有勤力啲改論文囉。
卓妮