明年二月政府將公布新一份《財政預算案》，按慣例近日各黨派都向財政司司長曾俊華獻言進諫，前晚財爺就特別同幾十位建制派議員舉行飯局，乘機收風。不過，據聞前晚笑料百出，民建聯蔣麗芸（Ann）建議每名出世嬰兒獲政府派發一萬元，然後每年派一次，直到十八歲為止。佢深信呢個建議可幫班後生仔買樓，但唔知到時十八萬元貶值到咩程度呢？一層樓又升到幾多錢呢？
聽聞前晚阿Ann提出呢個建議時，財爺即刻望住同枱嘅民記主席譚耀宗，譚就以一副冷面話，呢個建議係阿Ann個人意見，同該黨無關。
我哋事後問番阿Ann，佢話眼見唔少大學生畢業後一身債，如果財爺設立「嬰兒基金」，咁起碼成年後每個人都有筆錢傍身。佢仲話，呢個計劃主要係幫年輕人儲蓄，所以成年後先可以動用筆錢，計過政府每年最多只係畀一百億元，真係濕濕碎喎。
其實錢銀事小，但阿Ann呢種派錢方案，隨時令到年輕人心態改變，以為派錢係與生俱來，所以與其派錢，倒不如教吓年輕人理財，由細儲番個錢好過啦。