政情：青務委會唔要老餅
雖然佔領行動已經結束，但仍然有唔少問題需要特區政府處理同解決，當中最急切要處理嘅就係青年人對政府嘅不滿。雖然當局仍然諗住透過民政事務局轄下嘅青年事務委員會及公民教育委員會搞多啲青年活動，但據聞當局有意換走兩個年過半百嘅主席，取而代之分別由香港青年聯會（青聯）主席霍啟剛及民政事務局前常任秘書長楊立門接掌兩個委員會，一洗委員會「老餅」味。
青年事務委員會及公民教育委員會現時分別由觀塘區議會主席陳振彬同和富大埔足球隊會長李宗德執掌，由於兩人年紀分別五十六歲同六十三歲，被質疑同後生仔脫節，甚至搞嘅活動未能切合年青需要。兩人任期將會喺明年三月底屆滿，加上佔領行動一役令當局深深明白到青年政策嘅重要性，希望兩個委員會日後可以搞多啲符合青年人口味嘅活動。
楊立門或掌公民教育委會
據聞當局近日積極物色兩個委員會下屆主席人選時，有意搵同青年人「有偈傾」嘅人做新主席。由於啟剛依家已經係青年事務委員會委員，加上佢年紀唔算太大，所以由佢接任委員會主席亦尚算合理。至於公民教育委員會，當局有意搵啱啱退下火線嘅楊立門接任主席，消息話，雖然楊立門年紀有番咁上下，但由於佢喺政府任職多年，對各項政策非常熟悉，加上佢外表尚算後生，相信容易被外界接受，令委員會日後工作不致於太過離地。
工聯會理事長吳秋北之前話要「放棄」犯法嘅年輕人，但民政事務局局長曾德成就無咁做，事關佢早喺佔領行動發生時，已經透過青年議會約佔領人士傾偈，了解佢哋嘅諗法。佔領行動結束後，佢又再約咗另一批後生仔，收集佢哋對政府施政嘅意見。不過，青年喺會上都係表達對政改不滿，並非關心難買樓、升職等問題。如果當局真係有心解決青年問題，就真係唔好再「落錯藥」嘞。