政情：中環出更：阿王寸一舊雲唔識抱B
立法會尋日繼續審議男士三日有薪侍產假條例草案，民主黨黃碧雲（一舊雲）提出修訂，要求將侍產假由三日改為七日，並要求僱主支付全薪。為咗演說更加逼真，一舊雲甚至抄工聯會王國興（阿王）條橋，帶埋個BB公仔道具出席會議，不過佢就捉住BB公仔隻腳係咁搖，嚇到阿王要向佢示範點先係正確抱BB方法。
阿王話，正確抱BB方法應該係先要用手臂傍住個B，另一隻手臂要托任個BB個頭，以保護BB嘅脊骨同頸骨。聽到阿王寸佢唔識抱BB，一舊雲即時提出規程問題，要求代主席梁君彥（Andrew）裁決阿王教人抱BB同討論緊嘅修正案有咩直接關係。
以免教壞家庭觀眾
雖然Andrew叫阿王停止發表同修正案無關嘅言論，但阿王繼續寸爆一舊雲抱BB係一個唔好嘅示範，所以佢先要對睇直播嘅市民作出溫馨提示，提醒佢哋點先至係正確抱BB嘅方法。見到阿王唔理Andrew裁決繼續發言，一舊雲即時提出申訴，點知Andrew都覺得阿王言之有理，叫大家唔好學一舊雲咁抱BB喎。
卓妮