政情：中環出更：新進傑青實踐綠色生活
全球水資源短缺，倡議珍惜食水已成為大趨勢。國際青年商會香港總會日前舉行十大傑出青年選舉頒獎典禮晚宴，多位得獎者從事家電、設計等與環保息息相關嘅行業，包括德國寶董事、香港工業總會青委主席陳嘉賢（Karen）及本地室內設計師羅靈傑（Ajax），佢哋都好有先見之明，每日實踐緊節約用水嘅生活之道。
卓妮見世界綠色組織創辦人及行政總裁余遠騁都有出席支持活動，佢話自己頭髮長咗，影響沖涼速度，所以為咗盡量慳水，差唔多係時候要去剪髮喎，又話每日沖涼平均只用大約五至六分鐘。
余遠騁挑戰兩分鐘沖涼
不過，大家毋須驚訝，事關余大爆環境局局長黃錦星及副局長陸恭蕙都只係用兩分鐘沖涼，皆因佢哋頭髮夠短，加上軍訓都係用呢個速度沖涼，所以佢要向呢個目標進發。
至於Ajax亦係環保分子，除咗室內設計時要考慮環保元素，家中亦裝咗自動感應燈，洗完手嘅水則可直接流入坐廁水箱再用，為環保出分力。另外，當晚佢戴住嘅眼鏡非常特別，係購自巴黎嘅3D打印眼鏡，佢話現時唔單止飾物開始使用3D列印技術，連成間屋都可以用水泥混合其他物料列印出來，亦係家具未來發展嘅新趨勢。
當晚得獎嘅仲有香港鐘表業總會主席高鼎國、港大醫學院助理院長曾詠恆及Karen等。Karen都有唔少環保心得，佢話好多人對節約水電概念有誤，例如即熱式熱水爐看似用電量大，但由於耗電時間比預熱式熱水爐短，所以慳電好多。
Karen仲話，沖涼時選用面積較大，但出水孔偏疏和細花灑頭，感覺一樣舒服，而且仲慳水得多。
卓妮