雨水倒灌湧屋 房協唔踢唔郁
雨水倒灌波及室內單位，房協竟死撐排水系統運作正常！土瓜灣樂民新村低層單位每遇豪雨皆有雨水倒灌，大量雨水從陽台排水渠湧進屋內，更波及客廳，住戶多次向房協反映卻未獲正視，直至接獲本報轉介後，房協始急急進行排水系統改裝工程。區議員指村內排水系統設計落後，不少低層住戶亦有類似問題，要求房協於雨季來臨前作全面改善。
「一落雨騎樓就水浸，啲水去唔切就湧埋入廳，試過有一晚凌晨四、五點啲水去到牆腳位咁高，要通宵清走啲水！」李太一家於二○一二年底入住樂民新村低層單位，兩年來每逢大雨，雨水皆會從陽台排水渠倒灌入屋，問題尤以雨季最為嚴重，令生活大受困擾。
派員巡查揭淤塞 不了了之
李太指入伙未幾發現問題後，已即時向房協反映，可惜未獲跟進，至翌年雨季問題再度出現時，房協仍然愛理不理，「房協搵人上嚟，話可能喉管入面生銹塞咗，跟住就冇下文！今年已經有啲傢俬浸濕咗要換，出年如果又係咁點算？」
記者實地了解期間，發現單位內有牆壁出現疑似水浸痕迹。李太指陽台去水位直接駁至大廈排水渠，惟於地面卻未見有去水口，懷疑排水渠設計有誤，致雨水量過多時排水渠會出現倒灌。
香港房屋協會發言人證實，今年八月底曾接獲相關報告，隨即派員檢查有關單位雨水渠，確定並無淤塞，但指當時本港發生多次特大暴雨，加上涉事單位處於低層，認為或因積水未及排走而導致溢流。發言人強調，屋邨辦事處會在雨季期間加強巡查，確保排水系統運作正常，長遠亦會考慮改善單位的雨水排放系統。
李太證實，房協於事後已即時安排改裝排水管工程，並在大廈地下加裝排水口，「搞咗咁耐終於肯做啲嘢去改善，如果唔係搵傳媒投訴，個問題都唔知幾時先解決到！」
樂民新村舊式設計出問題
「其他低層住戶都有類似問題，始終呢條已經係舊村，水渠都係成四十年前嘅舊式設計，當然會出問題！」當區區議員楊永杰直指樂民新村的排水渠設計落後，未能符合現代需要，房協卻一直以設計符合標準為由拒絕處理，要求全面檢視區內系統，以徹底解決問題。楊又稱，自港鐵沙中線工程啟動後，區內排水系統亦被改動，地盤沙石或會堵塞排水渠，影響附近排水系統運作，要求房協與其他部門留意情況，為來年雨季做好準備。
投訴組