好咯！好咯！神憎鬼厭嘅佔領行動終於落幕，禍港殃民嘅牛鬼蛇神終於就擒，金鐘開通，香港重光，一場歷時兩個半月嘅政治鬧劇終於畫上句號。之不過咁，舊一頁結束就係新一頁嘅開始，佔中鬧劇曲終人散，不代表事件就此完結，反而意味着秋後算帳揭開序幕，如果幕後搞手以為坐完豬籠車就可以甩身，逍遙法外，咁就實在係太傻太天真嘞。
嗱，趁佔中收檔，就等功夫茶同佢哋埋單計數，算一算損害經濟呢筆帳先喇。佔領行動違法堵路兩個半月，破壞社會秩序，影響市民生活，打擊消費市道，對整體經濟嘅損害可謂難以估計。以飲食業為例吖，單單旺角、銅鑼灣同金鐘三個重災區，業界喺十月及十一月份嘅生意額已經合共損失三十億元，平均每日唔見五千萬元，簡直一殼眼淚。而喺政治高氣壓之下，今年聖誕、新年檔期嘅酒樓及酒店餐廳訂座人數更加大減，加上個人遊消費意欲急降，估計今年總收益遠比預期遜色，你話呢場政治鬧劇幾咁累街坊吖。
佔中損害經濟，市民蒙受損失，可以向邊個追討呢？嗱嗱嗱，呢個就係今日要講嘅重點嘞。正所謂，冤有頭，債有主。商戶同市民被佔領亂象害到雞毛鴨血，要討債咯喎，矛頭梗係直指嗰班身為罪魁禍首嘅幕後搞手喇。就講近日吖，社會掀起一股浩浩蕩蕩嘅佔中索償潮，市民紛紛入禀法庭向佔領首腦索償，有人指控戴耀廷，有人狀告淫賤黎，有人索償幾百蚊，有人索賠數千元，總之群情洶湧，如潮湧至，誓要害人精得到報應，誓要洋奴得到懲罰。開講有話，小數怕長計。曾經受佔中影響嘅市民何止百萬，如果人人挺身而出，向呢班搞亂香港嘅壞蛋入禀索償，佢哋破十次產都唔掂吖！
無錯嘞，打蛇打七寸，擒賊先擒王。佔領鬧劇雖然已經落幕，不過呢班主腦人物一日逍遙法外，正義一日無法伸張，香港依然永無寧日。尤其係嗰個淫賤黎，佢喺佔中赤膊上陣，何只係幕後搞手，仲係最大金主、陣前總指揮，如果呢種人可以逃過法律制裁，香港嘅法治招牌肯定淪為笑話。最令人氣憤嘅係，佢有膽做，冇膽認，喺早前嘅索償案中睜大眼講大話，居然以「唔關佢事」為由，成功剔除三宗訴訟，簡直不知羞恥為何物。到日前法庭處理另外十五宗訴訟時，佢又想重施故技，結果被裁判官拒絕，奸計先至無法得逞咋。
公道自在人心，淫賤黎究竟係咪佔中鬧劇嘅罪魁禍首，畫公仔唔使畫出腸喇。老實講，如果佢唔係千夫所指嘅幕後黑手，又點會被市民淋屎尿掟豬雜吖？如果佢唔係洋奴走狗嘅黑金金主，又點會喺尋日清場博拉時受到泛民政客群星拱照吖？不如咁喇，各位市民，既然幕後黑手搞佔領，大家不妨亦搞佔領，以索償官司逼爆法庭，將害人蟲告到甩褲，咁香港就真係一天都光晒嘞！