政情：阿忠屋企天台種出大南瓜

早幾年唔少政界人士被揭發屋企有僭建物，紮根葵青區嘅街工立法會議員梁耀忠（阿忠）當年都被爆位於佐敦嘅屋企天台搭建咗大型簷篷，當時佢已立即安排承辦商拆除。不過咁大個天台任佢丟空，確係好浪費，後來阿忠索性將天台化身成種植場，用嚟種吓蔬果當係陶冶性情，最近仲有所收成，種出一條大南瓜，都算係「種瓜得瓜」喇！

聽阿忠講，呢株南瓜得來不易，皆因天台拆咗簷篷後變得好熱，佢試過種好多唔同植物，但係啲莖葉一掂到木製花欄時，就會熱到「瓜」咗。今次呢株南瓜好彩有嘢遮蔭，先至可以開花結果。自己一手一腳種出來的南瓜實好好味喇！不過聽阿忠話，佢一向唔喺屋企煮飯，所以嗰條南瓜最後送咗畀位朋友喎！

講開又講，阿忠服務街坊咁多年，係時候搵接班人。不過講就容易，阿忠話，相信來緊兩年嘅區議會同立法會選舉，佢都仲係要繼續出選o架喇！