中環出更：環境局短訊謝票冇誠意？

近期政府施政頻頻受到泛民議員拉布阻撓，上星期擴建將軍澳堆填區撥款申請獲得立法會財務委員會（財委會）通過，算係近期嘅異數。要數幕後功臣，成日要喺會議室坐定定撳掣投票嘅建制派議員，自然冇功勞都有苦勞。有建制派議員私下批評，事後環境局官員淨係傳個大圍答謝短訊畀佢哋就算，覺得對方無乜誠意喎！

該建制派議員話，平時環境局已經甚少主動向議員箍票，後來撥款申請過關後，環境局向投贊成票嘅建制派議員傳咗個短訊，多謝連日留守議會令撥款順利通過。但係嗰答謝短訊無寫抬頭，有人就覺得環境局連多謝人都無乜誠意。

環境局政治助理區詠芷就話，該局三位問責官員同常任秘書長都有各自發送答謝短訊畀議員，眾人當時亦有企喺會議室門口謝票，環境局局長黃錦星更加多次同建制派嘅議員握手鞠躬，覺得可能係一場誤會喎！

不過講真嗰句，議員履行投票職責其實係天經地義，唔通要官員逐一請食飯先夠誠意？

卓妮