中環出更：盧健英融入香港 的起心肝學粵語
人在他鄉，融入社群最好方式係學好當地語言。香港台灣婦女協會早前喺深灣遊艇會舉行聖誕慈善派對，一眾台灣幫齊歡聚，台灣文化部駐港機構光華新聞文化中心主任盧健英都在場，卓妮見佢精神奕奕，睇嚟好適應香港生活。佢笑笑口話，眨吓眼駐港已經一年幾，決定的起心肝學好廣東話，咁先至可深入了解香港文化咁話。
咁啱最近文化部大地震，港人熟悉嘅部長龍應台及曾派駐香港嘅政務次長李應平同時辭官，令外界大感意外，卓妮梗要趁機問盧健英心情有冇受影響。佢好豁達話，官場有人來、有人走好正常，呢啲就係民主制度嘅常態，日子總要繼續過下去。
唔准同佢講國語
講講吓，佢話打算學好粵語以融入香港生活，第一步就係唔准同事同佢講國語喎！
當晚出席嘅仲有台北經濟文化辦事處處長嚴重光、遠東貿易中心主任陳愛蘭、香港台灣同鄉會前會長賴李承美、保良局前總理兼亞洲聯合財務公司董事總經理張炳煌夫婦等人。剛剛當選中華廠商聯合會婦委會副主席嘅仁愛堂副主席羅台秦，亦邀請廠商會婦委會主席陳陳燕兒、第一副主席兼廠商會候任會長李秀恒太太李阮錦鑾等好友赴宴，同台灣婦女協會會長林華琴（Judy）等寶島姊妹交流吓。
Judy見到咁多好友去撐場勁開心，佢話今次以慈善晚宴形式過聖誕零舍有意義，日後將盡量舉辦多啲活動，吸引更多居港台灣姊妹歸隊加入婦女會。
卓妮