「又到聖誕，又到聖誕！」歌仔都有得唱喇，聖誕節係普世歡騰嘅大日子，亦係香港人最鍾意嘅節日之一，尤其係平安夜倒數，熱鬧之餘又夠晒浪漫。可惜吖，今個平安夜隨時冇呢支歌仔唱喇。
點解咁講？答案好簡單，之唔係怕咗佔領人士囉。有消息話喎，今年嘅尖沙咀廣東道平安夜倒數活動將會取消，事關主辦商場擔心佔領大軍同埋鳩嗚兵團隨時殺到，影響名店生意咁話。嗱，雖然主辦商場仲未證實消息，但空穴來風未必無因，商戶亦話往年十一月底已收到商場通知，但今年到依家都未收到，怕且倒數活動都係停辦居多咯。尖沙咀唔辦倒數，其他地方都冇乜可能再搞嘅喇，有冇再可惜啲吖。
講真，平安夜倒數活動一直有聲有色，唔止吸引數以萬計市民參加，更有唔少旅客專誠嚟湊熱鬧，家陣話取消就取消，好冇癮啫。話時話，香港今年七國咁亂，好多人都想趁住佳節鬆一鬆，抖吓氣，家陣連呢個機會都冇埋，香港人怎一個慘字了得？再咁落去，新年倒數及煙花匯演都可能取消，市民咪乜嘢地方都唔使去？你話喇，今勻係咪多得佔領人士唔少吖。
唉，經過佔領之亂，香港元氣大傷，都唔知幾時先至復原。當局話喎，鐵定今日清場，係希望趕及聖誕節前令社會回復原貌。講就容易囉，破鏡難圓，社會撕裂嘅傷口又點會咁易回復原貌吖。大家有眼見，以前香港人溫文有禮，守法有度，幾咁溫馨。今時唔同往日咯，家陣唔係黃絲帶同藍絲帶嘈交，就係鳩嗚團四處撩是鬥非；唔係佔領人士同反佔領人士互相批鬥，就係警察同佔領人士埋身肉搏。所以話，就算成功清場，香港都好難返番轉頭，歲月靜好嘅日子睇怕一去不返喇。
講到呢度，功夫茶好想問一句，搞到今時今日咁嘅局面，除咗少數陰謀家，大部分人都係輸家，到底佔領人士幾時先肯收手吖？佔領打着「愛與和平」旗號，衝擊法治，阻人搵食，激化矛盾，根本同爭取民主背道而馳。嗱，早前先有一位女督察嘅真情剖白喺網上瘋傳，指警員因為佔領而超時工作，仲要承受市民辱罵，身心俱疲，點知呢位madam嘅老公仲要同佢打對台，支持佔領，搞到兩公婆感情大不如前。一場佔領，搞到幾多父子反目、夫妻不睦、朋友失和，大家心中有數喇。
至弊佔領搞手不甘失敗，講明即使清場，將來亦會伺機發難，香港永無寧日都似。港產官僚成日話果斷執法，撥亂反正，係真係假，今日見真章嘞，唔該擒賊先擒王，快啲將幕後黑手繩之以法，咪再拖喇！