有人說，人類在思考涉及自身的問題時，天生是個目的論者。在此意義上，人性場之所以分解為官場、市場和情場，完全起源於人類為釋放和克制自己心理上的原惡的需要。
要言之，因為本性需要，所以就有了。這個說法，對內地嘅貪官，無疑是度身訂造，然而，想不到在號稱「廉潔奉公」嘅香港，做公僕的，因本性追求娛樂至死嘅需要，把人的「原惡」放大，於是以權謀私，要有的──也就有了！
你看一個民航處處長羅崇文竟可以瞞天過海，豪花公帑把新總部大樓變「豪華娛樂城」，擅自額外興建一千五百平方米預留空間，儼然是個人行宮，有影音一流嘅「Ｋ房」、專為愛跳舞嘅老婆建造嘅舞蹈室、面積二百平方呎嘅豪華羅馬式大浴室，有人抵死咁話，浴室大到同老婆情到濃時鴛鴦浴足足有餘，就是學豬八戒與一群蜘蛛精戲水大戰也不在話下。
民航處呢單醜聞經本報及《太陽報》率先踢爆，審計署事後跟進，立法會帳委會接着追殺其混帳混吉之胡作非為，一個處長級「公僕」竟如此濫用權力，還死撐「有實際需要」、「內部溝通有失誤錯漏」，以乜都唔知卸責，完全侮辱市民及一眾尊貴議員嘅智慧。
昔日唐太宗告誡太子李治「竭力為善，則國家僅安；驕惰奢縱，則一身不保。」如今，此位羅崇文似娛樂大亨、土皇帝多過似民航處處長，運房局局長張炳良話要嚴正處理，追究到底；講真，咁識歎識享受嘅民航處處長，真有航空意外之時，老朽就唔多放心搵佢調查咯！
「驕惰奢縱，則一身不保」，老朽提醒張炳良局長唔好話交個乜鬼「報告」就當無事發生，再監管不力，官官相衞，唔該雙雙下台！