政情：張超雄長毛被「困」立會
泛民議員公然濫用立法會大樓設施畀佔領人士享用，例如帶示威者去議員用嘅浴室沖涼、長期霸住會議室瞓覺等。立法會行政管理委員會上星期已經決定用「三招」去制止呢啲濫用情況，而金鐘佔領區全面清場前夕，社民連梁國雄（長毛）同工黨張超雄嘅議員證突然失效，二人起初以為因濫用立會設施被懲罰，後來先知係一場誤會，撞正所屬樓層嘅電子門集體失靈。
尋晚七時許，長毛同張超雄係十樓辦事處突然被困，所有電子門都開唔到，長毛同張超雄起初以前曾濫用立會設施被懲罰，連張議員證都被取消，有人更估計係咪佔鐘區清場前夕，立會提前做「保安升級」，後來連前來「營救」佢哋嘅保安都開唔到度門，先知係電子門集體失靈，最後歷時一個鐘頭多啲，二人先重獲自由。據知被困期間，張超雄因辦公室一早上鎖，不得其門而入，相反長毛因長期唔鎖門，仲可以自由出入其辦公室。
