泛民立法會議員早前發起不合作運動，成功突襲立法會財務委員會轄下嘅工務同人事編制小組委員會，取得兩個小組嘅控制權。
不過，尋日人事編制小組開會討論政府增聘法官嘅建議時，民主派議員陳偉業（大舊）同陳志全（慢必）提出嘅修訂，因泛民議員唔齊人而被否決。泛民成日話議會被建制派壟斷，但畀佢哋掌握控制權時又自動棄守，同生人霸死地有乜分別？
尋日被否決嘅動議，包括慢必提出不應聘用曾經有嚴重疏忽、判刑過重同誤判嘅地區裁判官作為高等法院法官，仲有大舊提出唔應該聘請支持或反對雨傘運動嘅人士任法官， 點知兩議案全部被佔多數嘅建制派否決。連大舊都呻話，唔明點解喺泛民佔多數嘅委員會，佢哋提出嘅修訂都會被否決。