政情：方剛諗定退路卻愁邊個接班
立法會批發及零售界議員方剛本月初以七十一歲高齡，接替被撤銷全國政協嘅田北俊（田少）出任自由黨黨魁。佢坐正未夠一個月，就已經諗定兩年後「裸退」，全職湊孫，不過講起搵邊個接班，就極之頭痕。
坦言自由黨人少
方剛坦言，自由黨向來人丁單薄，直選議席更僅靠田少掹車邊一夫當關。佢話，缺乏地區樁腳一直係自由黨嘅「長期病」，因此近期積極透過青年團招攬新人，亦努力扶植合適人選備戰區議會選舉，希望明年區議會議席能夠由十二席增至十八席，咁樣立法會選舉就不至於場場打硬仗。
講到自由黨冇新血，方剛承認黨內領導層「來來去去都係嗰幾個」，至於田少高調招攬入黨的立法會議員林大輝，究竟意向如何？方剛表明已經盡咗力，假如大輝明年始終唔入黨，大不了夾田少再選多屆，笑言佢都肯捱義氣接任黨魁，田少冇理由托手（月爭）。吓？咁「換血」咪又要等多屆？