政情：謝凌高就 永文頭痛

政圈一直盛傳，謝凌同教育局局長吳克儉不咬弦，故此早已想轉換新環境，奈何一直未能搵到好歸宿。依家謝凌終於可以拍住民望一直遙遙領先嘅高永文，撇低好唔得掂嘅吳得掂，真係要偷笑。謝凌咁好彩係因為黎陳芷娟喺食衞局任職超過四年半，夠晒鐘調職，所以兩人對調都係一個適切嘅安排。

工作料唔太繁重

不過有人就質疑，食衞局來緊將要處理唔少燙手山芋，包括自願醫保計劃、對美容業及私家醫院嘅規管等等，仲有各種傳染疾病嘅防控措施等，樣樣嘢都好棘手。謝凌雖然係資深嘅官員，但係佢從來都未接觸過同食物安全或醫療相關嘅工作，難怪有人擔心佢未必可以勝任。

不過事實上，黎陳芷娟原本在食衞局負責漁農、食物安全、禽畜公共衞生及環境衞生政策，有關醫療及衞生嘅政策係由另一位常秘袁銘輝負責。相比之下，謝凌要處理嘅工作又唔係咁繁重，亦冇袁銘輝所負責嘅咁具爭議性，所以依家談論謝凌係咪能夠勝任，可能真係言之過早。

講番謝凌對吳得掂最大嘅不滿，就係吳得掂經常外訪或放大假，搞到謝凌要獨自揹鑊，相信佢成功「轉工」後，就可以開心笑喇！事關高永文出晒名勤力，事事親力親為，唔止唔會成日放大假、玩失蹤，就算公務外訪都會盡早返港。照咁睇，謝凌同高永文發生衝突嘅機會應該會少啲喇！