政情：中環出更：立法會「虛火」會議轉場
自從發生佔領運動以來，立法會大樓嘅示威區就一直畀示威者霸佔，仲擺咗唔少帳篷喺度，搞到立法會原定下個星期舉行嘅火警演習，都要將疏散集合地點由往常嘅立法會廣場改為添馬公園，變相令演習走晒樣。咁啱尋日立法會發生一場火警虛驚，好彩只係一場誤會，唔係就變成演習真人騷喇！
技術室出故障
立法會人事編制委員會原定尋日早上喺立法會大樓會議室開會，點知開會前會議室內嘅技術室傳出冒煙消息，保安人員仲攞埋小型滅火筒走去技術室，大批人員圍住現場，氣氛好緊張。好彩經檢查之後，只係技術室嘅電子裝置出現咗故障，令到會議室嘅視像系統唔能夠如常咁運作啫。
雖然火警只係虛驚一場，但係一班立法會議員就未能準時開會，要移師到另一會議室去開會。點知呢間會議室冇電子投票系統，議員進行表決時要用原始嘅舉手方法，仲要勞煩秘書處職員幫手數人頭，真係甩晒轆。
卓妮