首先提出佔中概念嘅戴耀廷，自從自首退場後化身「鍵盤戰士」，日日寫文繼續發表偉論。面對警方即使強力清場，佢尋日又撰文呼籲佔領人士盡快撤離，話繼續佔落去只會再失民心，就算堅持留守都應該和平地坐定定等畀警察拉。但學聯、學民同新成立嘅「勇武派」學生組織「學生前線」，均表明唔會「聽佢支笛」，後者明言會「以武制暴」，不排除以「最低武力」保護自己喎。雖然「戴魔」嘅魔法已經失效，但唔代表佢可以推卸責任，倘若聽日清場時血流成河，造成重大傷亡，戴耀廷勢成頭號戰犯、千古罪人。
