政情：泛民有私心 政改想轉軚？

政府爭取關鍵四票

明年審議嘅政改方案需獲三分之二立法會議員通過，先有機會完成「政改五部曲」實現特首普選。計埋四十二名建制派議員，都仲差泛民五票先夠數過關。不過，泛民二十六人早已矢言追求真普選，承諾倘方案唔符合國際標準必定予以否決，堅拒重蹈民主黨（白鴿黨）一○年同中聯辦密室談判嘅覆轍。換言之，即使主席曾鈺成投埋票都仲差四票，咁呢四票從何而來呢？

一直有傳轉軚大熱門人選包括逐步退隱嘅公民黨湯家驊、會計界梁繼昌（Kenneth）、資訊科技界莫乃光（Charles）同被指係「隱性」建制派嘅衞生服務界李國麟。大舊尋日爆料之後，我哋問過相關人士，泛民眾人莫不成為驚弓之鳥，爭住否認其事。Kenneth同Charles表明，一定會否決人大政改決議，堅拒轉軚；黃碧雲更加叫CY「死心」，白鴿黨嘅六票唔會變咁話。

講開又講，既然泛民慌失失表明心迹拒絕轉軚，咁咪繼續企硬囉，點知泛民尋日又去信政務司司長林鄭月娥，要求政府盡快組織多方政改平台。其實既然泛民拒絕合作，成立多方平台又有咩意義呢？認真搲頭。不過，照計目前最驚青嘅一定非李卓人同何俊仁（AV仁）莫屬，前者被揭發袋咗壹傳媒老闆肥佬黎嘅政治獻金，後者則喺立法會偷睇o靚模艷照被斷正，都話金錢同女人問題最難搞o架喇！不過講到底，都唔知大舊講嘅係真定假。