中環出更：泛民議員違規累各黨助理受罪
泛民主派立法會議員被揭發借議員「訪客」之名，帶「雙學」負責人、佔領人士及義工出入立法會大樓，唔單止喺大樓內食飯、沖涼，仲鋪床瞓覺過夜，更懷疑將立法會當做佔領行動指揮中心，認真離譜。立法會行政管理委員會（行管會）就提出三招新限制措施，包括規定議員助理只能留喺所屬辦公室樓層活動，結果惹來泛民及建制派嘅議員助理怨聲載道，認為新招妨礙日常工作，鬧爆嗰啲招待「訪客」嘅議員累街坊。
搞到好唔方便
有議員助理埋怨，佢哋唔係淨係服侍議員，仲要處理黨派事務，由於有啲黨派分布喺唔同樓層，有時出入送文件、臨時開會，或遇到突發事件時就好唔方便。如果要處理涉及唔同黨派嘅工作就更加麻煩，要勞煩其他議員助理或立法會職員幫手。
如今唔少議員助理都希望快啲取消有關新限制措施，而同屬泛民嘅「飯盒會」召集人梁家傑亦不忿話：「冤有頭，債有主，一人做事一人當」，要罰就罰嗰三位違規議員，即被行管會出信警告嘅社民連梁國雄、工黨李卓人及民主黨胡志偉，佢話無理由連累所有議員助理受罪喎。係囉，點解搞佔領行動堵路又要廣大市民受罪呢？
卓妮