現時正值各大專院校頒授榮銜旺季，尋日輪到港大專業進修學院，「西餅皇后」李曾超群（Maria）、廉政公署前副廉政專員郭文緯（Tony）及有「大會堂之父」稱號嘅藝術發展局前主席陳達文（Darwin），齊獲頒發首屆榮譽院士，三位傑出人士來自唔同界別，組合新鮮。

退休十二載嘅Tony，年屆六十七歲依然活躍，唔止係楊家太極高手，思想仲與時並進。講起時下眾多青年人上街抗爭，Tony苦口婆心，勸青年人唔好自視過高：「大學畢業只係開始，唔好以為大學生就一定有份幾萬蚊嘅工作等緊你，青年人要不斷進修學習，否則只會被社會淘汰。」

Tony並唔係得個講字，佢都以身作則推動國際反貪課程十多年。日前佢就帶一批來自印尼及尼日利亞嘅反貪官員嚟香港上堂，除咗參觀政府部門外，仲去佔領區巡視。班外國官員一睇，驚訝本來井然有序、經濟繁榮嘅香港，依家搞到立立亂，認真生在福中不知福喎。

Darwin上台致詞時都主動提到佔領行動，認為事件反映教育嘅重要性。佢話，只有透過教育，唔同階層人士改善向上流動機會，社會矛盾先會縮減，台下嘉賓無不報以掌聲。三位獲頒院士嘅人當中，年紀最大係八十六歲嘅Maria，佢年前完成中醫文憑課程，好學不倦，心得係絕不半途而廢。

卓妮