政情：煙民議員「打邊爐」新竇
我哋去年報道過立法會議員入面有三男一女「四煙剷」，而立法會議員出入口外嘅垃圾桶，同中信大廈對開草叢更加係佢哋一年四季「打邊爐」勝地，每逢立法會開會總會見到部分「食客」嘅蹤影。
唔怕撞正佔領者
不過，隨着佔領行動爆發，呢班食客為免食食吓煙同佔領者撞個正着被騷擾，或者被誤以為有份「佔鐘」，最近發掘咗個隱世新竇。
我哋收到風，原來新竇位於立法會停車場後面、近卸貨區嘅露天位置，食客貪嗰度屬立法會範圍、閒人免進，加上嗰度零零舍舍凹入咗，一般人行出行入都唔會輕易見到「食況」，私隱度滿分，難怪成為打邊爐新址喇！不過，眾所周知立法會大樓早已實施全面禁煙，新竇雖然喺露天地方，但係分分鐘都算係禁煙區，議員們隨時誤墮法網。其實佢哋不如學「四條煙」唯一女將，搵司機車去分域碼頭慢慢歎，咁咪高貴又疏乎囉！