政情:萬人自首 一呼無應

佔領行動持續近兩個月,「萬人自首」嘅場面會否出現即將有答案,事關佔中三子最快下月初自首。戴耀廷早前許下豪言壯語,揚言要打破同一時間最多人自首嘅世界紀錄,不過講就天下無敵,但響應嘅人少之又少,因為「雙學」學聯同學民思潮明確表態唔會主動自首,泛民兩大政黨民主黨同公民黨也對自首不情不願,「萬人自首」可能最終得啖笑。

為博上鏡 白鴿分批出擊

綜合各方消息指,佔中三子較早時已想自首退場,但「雙學」唔同意,一時話要推動議員辭職公投,令雨傘運動深入社區,一時又話要等埋闖關上京結果云云。時間一耐,佔中三子已心中有數,查實「雙學」無心跟隨自首,唔會自行離開佔領區。

至於泛民政黨都唔好得去邊,聞說大部分人對自首都不情不願。例如民主黨(白鴿黨)之前有百多人有份簽佔中同意書,但據聞有意跟隨三子自首嘅人唔多,主要係一批「老鴿」,例如蔡耀昌及陳樹英,至於另一批人就等清場,目的係務求該黨可以「博上鏡」,無論係咩結果,兩邊都抽足水。

公文袋有人自稱冇違法

至於由李卓人任主席嘅工黨,對於自首問題討論多時,至今仍係意見分歧,有人支持公民抗命概念,有人認為應該佔領到最後一刻,但講完一大輪都係無共識。

要數最離譜係公民黨(公文袋),正如該黨黨魁梁家傑開宗明義話唔會放棄佔領運動,唔會提早自首。我哋聽聞公文袋內根本無人想自首,事關有人認為自己冇做違法事情,只係行過佔領區或以義務律師身份出現。有社運人士聞言大罵公文袋「縮骨」,質疑係咪錫住個律師牌,點名指曾於金鐘大台代表泛民飯盒會發言嘅梁家傑,及曾到旺角佔區通宵留守嘅黨主席余若薇,都理應走唔甩要自首。

講開又講,有泛民中人更對於自首係咪等同認罪都拗餐飽。照咁睇,出現「萬人自首」機會近乎零,有無幾百人自首都成疑問,如只有數十人或更少人自首,呢個自首「世界紀錄」就真係貽笑大方嘞!

第一手消息請下載on.cc東網iPhone/iPad/Android/Windows Phone Apps