政情：林曉盈男仔頭 從小冇玩芭比
做工業嘅人總係畀人一種硬淨嘅感覺，啱啱新鮮出爐獲選香港工業總會青年工業家嘅昌利行董事「手套女王」林曉盈（Juliana），尋日喺電台節目透露，自細爸爸對佢要求好高，從來冇當佢係女咁教，仲將佢當做仔看待，所以佢性格男仔頭，更加由細到大都冇擁有過芭比（Barbie）公仔，亦極少買玩具。
講起童年玩具，Juliana話爸爸一向都唔鼓勵買太多物質嘢，而佢記憶中只有入讀小學之前買過部玩具衣車。冇嘢玩咁點呢？佢同當時大多數小朋友一樣，不時會自製玩具，例如有個乒乓波拍，但個乒乓波爛咗，佢哋就搵咗個羽毛球當乒乓波咁打，咁又玩一餐。
公幹唔坐商務位
Juliana自細亦培養出節儉美德，原來佢外出公幹從來都唔會坐商務客位，每次只係坐經濟位，但唔係佢唔想坐得舒服啲，而係坐經濟位慳到嘅錢，可以用嚟帶多幾個同事一齊去，等大家都可以體驗到其他地方嘅工作情況。至於住酒店方面，佢亦絕唔會揀五星級酒店及一個人住一間房，希望盡量減低成本喎。