政情：中環出更：睇好滬港通 「峰」狂掃貨
滬港通前日正式開通，但市場反應似乎麻麻，資金更加「南水北調」，睇嚟益咗上海多過益香港。一路以來力挺滬港通嘅金融服務界立法會議員張華峰，尋日同傳媒聚會時話，仍然睇好滬港通，喺滬港通效應下，港交所都應該受惠，而近期股價受壓，只係市場未習慣啫。
買入一萬股港交所
張華峰講講吓，突然間收到經紀電話，話港交所跌咗兩元，張即刻諗都唔諗，就同經紀講掃一萬股貨。若以尋日港交所收市價計算，佢幾秒已豪花一百七十幾萬元掃貨，完美演繹咩叫「秒秒鐘幾十萬上落。」佢話股市交投量增加，點都對港交所有利無害，仲大讚港交所行政總裁李小加好識搵錢，睇死佢唔會做蝕本生意。
講起證券業界，早前有傳政府話會擴闊金融服務界選民基礎，令多啲人可以投票，但張華峰話最新消息應該係維持不變，因為北京對今次佔領行動好有意見，所以連小小甜頭都唔畀香港。
如果根據呢個邏輯，滬港通算唔算係甜頭呢？究竟係好事定壞事呢？
卓妮