中環出更：長毛打茅波 立會險勝大狀
立法會足球隊尋日同大律師公會踢咗場友誼賽，前者人強馬壯，除咗六名議員包括隊長陳克勤、梁志祥、何俊賢（高佬賢）、郭偉強、「長毛」梁國雄及馬逢國外，仲請咗唔少外援，包括足球猛將李健和、丘建威、鄭兆聰及立法會保安員。至於大狀隊都唔弱，更獲公會主席石永泰到場打氣，最後立法會只係以三比二險勝。卓妮現場所見，長毛經常打茅波，又扯衫又攬實對方球員，阻人接波，而且上半場未完就已走人。
高佬賢「要驗尿」
立法會隊除咗長毛打茅波外，亦有唔少蝦碌鏡頭，議員何俊賢就因為腸胃不適而遲到，但都好好彩射入一球，有現場觀眾仲講笑要佢驗尿，睇吓有冇食禁藥喎。至於議員馬逢國就在開場前戴晒太陽眼鏡練波，但只係上半場掂吓個波就換咗出來，之後全程吹水冇再落場。至於大狀隊方面，隊長在開場十分鐘後就受傷離場添！立法會足球隊下月初會同電腦商會入元朗踢場友誼賽，聽講梁志祥會喺完賽後請食盆菜，希望吸引多啲人參加喎！
卓妮