政情：哥頓爆當年「分家」秘聞
合和實業主席胡應湘（哥頓）尋日接受電台訪問，大談童年往事同成名史之餘，仲自爆當年兄弟姐妹曾經對「分家」出現過少少拗撬，幸好無釀成爭產風波。哥頓話，爸爸胡忠初年養豬維生，後來同朋友夾份買咗架的士轉行做的士司機，之後就用多年積蓄做生意。哥頓喺九兄弟姐妹中排名第七，佢憶述爸爸當年特別錫佢，後來佢創立合和實業，都係因為得到爸爸在金錢上嘅支持。
命名胡忠大廈報父恩
正因為咁，當年灣仔胡忠大廈落成時，佢特登用父親名義命名，令當時年邁嘅爸爸非常感動。哥頓話，佢非常佩服爸爸敬業樂業嘅拚搏精神，又話爸爸成日教佢要認清人生目標，同埋做人要勇於從失敗中吸取教訓。
哥頓早年積極收購灣仔一帶嘅舊樓重建成新大廈，令佢有「灣仔王」嘅美譽。佢話，灣仔位處全香港嘅中心，有一定升值潛力，所以佢當年派人逐一收購區內舊樓，事實證明自己幾有眼光喎！